Алматыда жерасты есірткі зертханасын ұйымдастырушыға үкім шықты
АЛМАТЫ. KAZINFORM – Алматы облысының 35 жастағы тұрғыны 2024 жылдың қазан айында жерасты есірткі зертханасын ұйымдастырғаны үшін 8 жылға бас бостандығынан айырылды.
Полицияның мәліметінше, зертхана Медеу ауданының жеке секторында орналасқан. Қала прокуратурасының үйлестіруімен жүргізілген арнайы іс-шара барысында полиция қызметкерлері 21 келіден астам дайын мефедрон, химиялық реагенттер, есірткі өндірісі мен буып-түюге арналған құрал-жабдықтарды тапты және тәркіледі.
– Есірткі зертханасының ұйымдастырушысы кінәлі деп танылды. Ол тиісті жазасын алады. Мұндай қылмыстар қоғам үшін үлкен қауіп төндіреді. Сондықтан Алматы полициясы есірткі қылмысына қарсы күресті жүйелі түрде жалғастырып келеді, - деді Алматы Полиция департаменті есірткі қылмысына қарсы күрес басқармасының бастығы Мұрат Жұмабаев.
Полиция есірткі жасағаны және таратқаны үшін қатаң қылмыстық жауапкершілік қарастырылғанын еске салды.
Айта кетейік, биыл жеті айда есірткіге қатысты 4 655 құқықбұзушылық анықталды, олардың 2 100-і ауыр және аса ауыр қылмыстар санатына жатады.
Ұйымдасқан қылмыстық топтарды құру және басқару фактілері бойынша 24 қылмыстық іс қозғалды, оның ішінде үш трансұлттық қылмыстық топ жойылды. 12 басшы мен 48 белсенді қатысушы ұсталды.
