Алматыға рейс брондайтын туристер саны 1,5 есе өсті
АЛМАТЫ. KAZINFORM — Алматыға келетін саяхатшылардың бағыттары мен туристер санына зерттеу жүргізілді.
Талдау саяхаттың негізгі кезеңдерін қамтиды — жоспарлау, брондау, орналасу мен демалыс.
Алматы — еліміздегі басты туристік орталықтардың бірі. Орталық Азияда барлық туристік сұраныстарының 29,7 пайызы Алматыға тиесілі.
Өсімді әуе рейстерінің көбеюінен байқауға болады: Алматыға рейстер саны дәстүрлі әуе компанияларында 24,7% -ға және лоукостерлерде 44,5 пайызға артты. Қайта келушілердің үлесі 78,6%-ға өсіп, 25 пайызға жетті. Әсіресе ірі шаралардың алдында билеттерді ертерек, 40 күн бұрын іздеу уақыты 24 пайызға өскенін көрсетеді.
Almaty Tourism Bureau мәліметінше, Алматыға рейс брондайтын жолаушылар саны 1,5 есе өскен. Бұл қолжетімді рейстердің көбеюімен байланысты. Алдыңғы қатардағы 10 елдің ішінде Қытай көш бастап тұр. 2024 жылдың бірінші жартыжылдығында бұл елден брондаулар саны 6 есеге артып, 25,2 мың билетке жетті. Ең көп брондау Түркиядан жасалған, бұл Қазақстанмен іскерлік байланыстардың тығыздығына қатысты.
Алматыға келетін туристер белсенді демалысты жөн көреді: Саяхатшылардың 54 пайызы турлар мен экскурсияларды таңдайды. 44% -ы джип-турларды жөн көреді. Гастрономия, шопинг және ойын-сауық жоғары бағаланады.
Отбасылық туризмге қатысты жағымды пікірлер үлесі 12 пайызға өсті. Іскерлік шығындар белсенділік, инвестициялар және халықаралық форумдардың көбеюіне байланысты үш есеге артты.
Еске салайық, бұған дейін шетелдік туристер қаражатының 50 пайызын жатын орынға жұмсайтыны туралы жазған едік.
