Алматылықтар 22 млрд теңге көлік салығын төлеген

АЛМАТЫ. KAZINFORM — Алматыда көлік құралдарына салынатын салықтан түскен қаржы біршама өскен.

2025 жылы салықты 456 328 адамға есептелген, бұл 764 мың көлік. Салықтың жалпы сомасы 21,9 млрд теңге болды. Бұл өткен жылмен салыстырғанда 2,3 млрд теңгеге артық.

Алматы қаласы бойынша Мемлекеттік кірістер департаментінің өндірістік емес төлемдер басқармасының басшысы Қанағат Күлембаевтың айтуынша, оң динамикаға қарамастан, көлік салығы бойынша берешек сақталып отыр. Бүгінгі күні 60 835 азаматтың 3,9 млрд теңге қарызы бар, оның 3,6 млрд теңгесі көлік салығы бойынша қарыздар.

Спикер «e-Salyk azamat» мобильді қосымшасы, kgd.kz сайты және онлайн-банкинг арқылы салықты тез төлеуге болатынын атап өтті.

— Салықты төлеу автокөліктің тіркелген жері бойынша емес, тұрғылықты жері бойынша жүзеге асырылатынын есте сақтау өте маңызды, — деді ол.

Еске салайық, бұған дейін BI Group, BAZIS тағы басқа компаниялар 17 млрд теңге салық төлегенін жазғанбыз.