Алматылықтар қоқысты сұрыптауға дайын емес - Досаев
АЛМАТЫ. KAZINFORM - Алматы әкімі Ерболат Досаев Наурызбай ауданының тұрғындарымен кездесті.
Кездесу кезінде шаһар басшысы қоқыс шығару мәселесіне тоқталды. Әкімнің айтуынша, 2023 жылға дейін қоқыс шығаратын компанияларды ешкім тәртіпке шақырмаған.
- Олар қоқысты өз қалауынша тасып жүре берді. Сондықтан ұзақ мерзімді келісімшартты бұзып, жаңасын жасастық, - деді әкім.
Сондай-ақ сұрақ-жауап сессия барысында 2024 жылы краны бар 20 қоқыс таситын көлік алынғаны және биыл тағы 70-і жаңаратыны айтылды.
Ерболат Досаев өз сөзінде қоқыс сұрыптау мәселесіне де тоқталып өтті.
- Алматылықтар қоқысты сұрыптауға қаншалықты дайын деген сұрақ ауада қалқып тұр. Меніңше, кешке қалдықтарды әртүрлі пакетке бөліп отыруға ешкім дайын емес. Бірақ бұл әдетті қалыптастыру бойынша жұмысты жалғастырамыз. Жинау, сұрыптау, утилизация жұмыстарын қамитын тұтас жүйе жасаймыз, - деді ол.
Еске салайық, бұған дейін Алматы облысында 215 заңсыз қоқыс үйіндісі анықталғанын жазғанбыз.
