Алматының «Алатау» театрында жаңа маусым премьерамен ашылды
АЛМАТЫ. KAZINFORM - «Алатау» дәстүрлі өнер театры VIII маусымның шымылдығын түрді. Жаңа маусым «Alatau FM radiosy» спектаклінің премьерасымен ашылды.
«Алатау» театрының директоры Мақсат Нұралиев маусымашар конференция кезінде театрдың жоспарларымен бөлісті.
- Өскелең ұрпақты тәрбиелеп, жақсы бағытта қалыптасуы үшін жақсы дүниелерді осы театрымызда қойып жүрміз. Былтыр маусымды премьерамен жауып, биыл премьерамен ашып жатырмыз. Бүгінгі «Alatau FM radiosy» қойылымынан бөлек, “Біржан сал” қойылымын жарыққа шығару жоспарымызда бар. Келесі жылы Нұрғиса Тілендиев ағамыздың 100 жылдығына, сондай-ақ Қорқыт ата жайында спектакль қою ойымызда бар, - деді театр директоры.
Ал «Alatau FM radiosy»музыкалық комедиясының режиссері Есләм Нұртазин жаңа қойылымда көрермендерді әзіл-қалжыңы жарасқан бүгінгі күннің кейіпкерлері мен жанды дауыстағы ерекше әндер күтетінін атап өтті.
- Көктемде жаңа дүние жасайық деп ақылдасып, музыкалық комедияға тоқтадық. Ефрат Шарипов, Шыңғыс Маман деген жас авторлар осы пьесаны жазды, Ермек Меденов композиторы болды. Қойылымға театрдағы әнші-бишілеріміздің бәрін қосуға тырыстық. Шыны керек, бұл - өте қиын жанр. Жеңіл қабылданады, бірақ жасалған кезде көп еңбекті талап етеді, - деді Есләм Нұртазин.
Еске салайық, бұған дейін Алматыда Әуезов атындағы Қазақ ұлттық драма театрының 99-шы маусымы ашылғанын жазғанбыз.
Сондай-ақ Алматы қуыршақ театры бірнеше халықаралық фестивальде жүлделі болғанын жазғанбыз.
