Алматының Медеу ауданындағы көше қиылыстарының бірінде қозғалыс шектеледі

АЛМАТЫ. KAZINFORM - 2024 жылдың 18 қыркүйегінде сағат 7:00 бастап 19 қыркүйектің сағат 7:00-ге дейін Алматы қаласының Медеу ауданында Құрманғазы көшесі мен Достық даңғылының қиылысында автокөліктер үшін қозғалыс жабылады. 

Аталған қиылыс бойынша қозғалыс екі жаққа қарай тоқтайды. Уақытша шектеулер құбырларды ауыстырғаннан кейін жолдың асфальт-бетонын қалпына келтіру үшін енгізіледі. Жаңғыртылған құбыржол 5 көппәтерлі тұрғын үйді және тағы 4 объектіні жылумен және ыстық сумен қамтамасыз етеді.

- Уақытша қолайсыздықтарға түсіністікпен қарауды және көрсетілген аумақты айналып өту жолдарын алдын ала қарастыруды сұраймыз, - деп хабарлады «Алматы жылу жүйесі» ЖШС.

Еске салайық, бұған дейін Алматының кейбір көшелері қазан айының басына дейін жабылатынын жазғанбыз.

Сондай-ақ Алматы әуежайының екінші қабатына автокөліктердің кіруіне уақытша тыйым салынды.