Алматы әкімі халық алдында бүлдіршіннің тұсауын кесті
Жиында аудан тұрғыны Серік Қармысбаев атты қария әкімнен шөбересінің тұсауын кесіп беруін өтінді.
«Айналайын Ерболат балам! Менің бір шөберем бар еді. Соның тұсауын кесіп беріңдерші осы жерде. Бір айтайын дегенім. Көп рахмет», - деді ақсақал.
Ерболат Досаев қарияның өтінішін орындап, бүлдіршіннің тұсауын кесті. Кейін ақсақал қазақы дәстүрмен балаға батасын берді.
«Тұсауың кесілді құлама,
Тізеңді жаралап, жылама.
Құлындай құлдыраңдап жүгірші,
Кәнеки өзіңді сына да.
Секірсең құздан сүрінбе,
Шың құзға шыққанда бүгілме.
Болаттай қабырғаң қатайсың,
От, жалын ойнасын түрінде.
Алла тағалам Бауыржанның батырлығын берсін,
Абайдың ақындығын берсін,
Күләштің әншілігін берсін,
Табаның жерден таймасын.
Өзіңдей сияқты Ерболат,
Бір жерден шығатын үлкен азамат болсын!
Аллаһу акбар», - деп батасын берді қария.
Еске салайық, бүгін Алматы әкімі Ерболат Досаев қаланың Алатау ауданының тұрғындарымен кездесті.
Онда қала әкімі Алатау ауданында биыл жаңадан 50 аялдама салынатынын, аудандағы бес ықшам ауданның сумен жабдықтау және кәріз объектілерін «Алматы Су» мекемесіне беру үшін қажетті құжаттар дайындалып жатқанын, сондай-ақ, Алатау ауданында 7800 орындық 5 мектептің ашылатынын мәлімдеді.
