Алматы әуежайында жүк тасуға арналған арбалар ұрлануда

АСТАНА. ҚазАқпарат - Алматыда Қоғамдық кеңестің отырысында Бүкіләлемдік 28-ші қысқы Универсиада-2017 шарасын ұйымдастыру аясында Алматы әуежайының қызметін жетілдіру мәселесі талқыланды. Бұл туралы ҚазАқпарат тілшісіне қала әкімдігінің баспасөз қызметінен хабарланды.

Мәжіліс барысында Алматы әуежайының президенті Айбол Бекмұхамбетов кәсіпорынды дамыту жоспары жөнінде баяндама жасады. Жиын барысында қалың көпшіліктің назарын жүк тасуға арналған арбалардың жоғалып кету жағдайлары алаңдатты. 

«300 арба алған едік, 100-і ғана қалды. Енді тағы 600-не тапсырыс бердік»,-деді кәсіпорын басшысы.

Ал, Қоғамдық кеңес мүшесі Марат Шибұтовтың әуежайда орналастырылған 852 бейнекамераның «қайда қарап тұрғаны» туралы заңды сауалына Бекмұхамбетов нанымды жауап бере алмады.

Мәжіліс барысында Шибұтов жүк тасымалданатын аймақтың жұмысын реттеу қажеттігін айтты. Нақтырақ айтқанда, жүк тасушылардың санын арттыру, жүкті өткізу жылдамдығын жетілдіру, жүк салатын арбалардың санын көбейтумен қатар дәретханаларды тәртіпке келтіріп, ана мен балаға арналған орындардағы талаптардың дұрыс болуына жіті қадағалау қажеттігін айтты.