Алматы мен Лэйк-Плэсид Достық туралы хаттамаға қол қойды
Алматы әкімі сөзінде FISU Универсиада қалалары арасында халықаралық қауымдастық құруды жоспарлағанын, сондықтан бүгінгі Хаттама осы бағыттағы маңызды қадам екенін атап өтті.
«Биылғы Универсиадаға қатысушылар саны жағынан рекордтық көрсеткішке жетті, жарыстардың билеттері түгел сатылып кеткен. Халықаралық алқалы жарыстың елімізде өтуі арқасында біздің жастарымыз бүкіл әлемнен келген студенттермен жүздесті, танысты. АҚШ спорттық шараларымен танымал, сондықтан спорттық туризмді дамыту барысында бізге Лэйк-Плэсидтің тәжірибесі өте маңызды», - деді Б.Байбек.
Өз кезегінде Лэйк-Плэсид мэрі Крэйг Рэндалл Қазақстанға алғаш рет келгендігін, аз ғана уақыт ішінде еліміздің айтулы жетістіктерге жеткеніне таңданыс білдіретінін айты.
«Біз Алматының көрнекті жерлерімен, көз тартар табиғатымен танысып үлгердік, биік таулар ерекше әсер етті. Универсиада Олимипиада ойындары сияқты өте жоғары деңгейде ұйымдастырылған. Сіздер тамаша спорт нысандарын салыпсыздар. Мысалы, сонау 30-шы жылдары Олимпиадаға салынған Лэйк-Плэсидтегі нысандар әлі де жұмыс істеп тұр. Жастар өз үйлерінің терезелерінен ұлттық құрама атлеттерінің қалай жаттығып жатқандарын көріп, спортқа деген құлшыныстарын арттырады. Уақыт бұл инвестицияның дұрыс екендігін көрсетті. The New York Times басылымының Қазақстанды 2017 жылғы туристік бағыттар тізіміне енгізгені қуантады, бұл Қазақстан басшылығының туризмді дамытуда орасан зор жұмыстар жүргізіп жатқандығын көрсетеді», - деп атап өтті К.Рэндалл.
Нью-Йорк штатының сенаторы Элизабет Литтл Универсиада арқасында Алматыға келгенін қуана айтты.
«Мен Алмалы округтің өкілімін, бірақ біздің алмалар «Көк базарда» дәмін татқан алматылық алмаға тең келмейді. Алматы елдің қаржы орталығы болғанымен, қалада саябақтардың, демалыс аймақтарының көп екендігін, адамдардың спортпен шұғылдануға құштарлығын байқадым», - деді сенатор.
Кездесу барысында туризмді тұрақты дамыту жөніндегі өңірлік офистің бас директоры Джеймс Маккенна мультипликативті әсердің спорттық туризмді дамытуға ықпалы мол екенін айтты.
«Сіздер географиялық жағынан өте жақсы жерге орналасқансыздар, осы бағытта алға жылжу қажет. Спортқа инвестиция қаншалықты көп бөлінсе, әлем де жақсара түседі, өйткені, спорттың адамдарға берері мол», - деді ол өзінің сөзінде.
Американың Лэйк-Плэсид қаласы 1932 және 1980 жылдарғы Олимпиаданың, FISU 1972 жылы өткізген әрі 23 елдің 500 спортшысы 27 спорт түрі бойынша сайысқан қысқы Универсиаданың астанасы.