Алматы облысында құтқарушылар қар құрсауынан 130-дан астам адамды құтқарды

АСТАНА. 12 ақпан. ҚазАқпарат - Алматы облысында құтқарушылар қар құрсауынан 131 адамды құтқарды. Бұл туралы ҚР ТЖМ-нан хабарлады.

11 ақпан күні таңсәріде облыс бойынша ТЖД-ның кезекші бөліміне Керібұлақ ауданы «Сарыөзек-Қорғас» автожолының 16-шы шақырымында 45 автокөлік (40 жеңіл және 5 жүк көлігі) пен 125 адам қар құрсауында қалып қойғандығы туралы хабар түсті.

Осы күні түстен кейін Алакөл ауданы «Алматы-Өскемен» күре жолының 571-ші шақырымында 4 техника (3 жеңіл және 1 жүк көлігі) мен 6 адам қалып қойғандығы жөнінде тағы бір қоңырау шалынды.

Құтқару жұмыстары барысында барлық көлік құралдары жолдың тазартылған бөлігіне шығарылды. Зардап шеккендер жоқ.