Алматы облысында мектеп оқушысын жүк көлігі қағып, мерт қылды
АЛМАТЫ. ҚазАқпарат – Алматы облысында 8 жасар оқушы иттен қорқып, жолға жүгіріп шыққан. Оны жүк көлігі басып кеткен, деп хабарлайды ҚазАқпарат тілшісі.
Алматы облыстық полиция департаменті жол апатының 8 қазан 13:20-да Есік қаласында болғанын мәлімдеді.
«Isuzu» жүк көлігінің 35 жастағы жүргізушісі Малькеев көшесінің бойымен келе жатып, бүлдіршінді қағып кеткен. Тротуармен келе жатқан 8 жасар бала иттен қорқып қашып, жолға жүгіріп шыққан. Бала алған жарақаты салдарынан оқиға орнында қаза тапты. ҚР ҚК 345-бабы 3 бөлігі бойынша сотқа дейінгі сараптама тағайындалды», - деді Алматы облыстық ПД баспасөз қызметінен.
Авторы: Еламан Тұрысбеков
