Алматы облысының бұрынғы бас өрт сөндірушісі 5 жылға сотталды

АСТАНА. ҚазАқпарат - Талдықорған қалалық сотында сыбайлас жемқорлық бойынша айып тағылған Алматы облысы Төтенше жағдайлар департаменті «Өрт сөндіру және апатты құтқару жұмыстары» ММ бұрынғы басшысына қатысты үкім шығарылды, деп хабарлады облыстық соттың баспасөз қызметі.

Бұрынғы басшы ҚР ҚК 189-бабы, 3-бөлігі 1,2-бөлімшелерінде көрсетілген («Мемлекеттiк функцияларды орындауға уәкiлеттік берілген адам не оған теңестiрiлген адам не лауазымды адам не жауапты мемлекеттік лауазымды атқаратын адамның сенiп тапсырылған бөтен мүлiктi иемденiп алу немесе талан-таражға салуы») қылмыстарды жасауда айыпты деп танылды.

Оның қылмыстық жолмен тапқан ақшасы тәркіленіп, жалпы режимдегі түзеу колониясына 5 жылға қамалды және өмір бойына мемлекеттік органдарда лауазымды қызметтер атқаруға тыйым салынды.

ҚР ҚК 49-бабы, 1-бөліміне сәйкес, «полковник» арнайы әскери атағынан айырылды. Оған пара беруші - «ZHETYSU GLOBAL» ЖШС директоры ҚР ҚК 28-бабы, 5-бөлімі, 189-бабы, 3-бөлімі бойынша кінәлі деп танылып, ҚР ҚК 63-бабына сәйкес, шартты түрде 5 жылға сотталды. Тағы бір пара беруші - «АвтоҚазСервис» ЖШС мемлекеттік сатып алулары бойынша жұмыс істеген жеке кәсіпкерге ҚР ҚК 28-бабы, 5-бөлімі, 189-бабы, 2-бөлімі бойынша айып тағылып, 1 484 700 теңге көлемінде 700 АЕК айыппұл салынды.

Сот үкімімен сотталушылардан ММ пайдасына 2 225 106 теңге және 504 239 теңге процессуалдық шығын мен 22 251 теңге мемлекеттік баж салығы өндіріп алынды.