Алматы полициясының қызметі тексеріледі - ІІМ
АСТАНА. ҚазАқпарат - Алматы қаласының Ішкі істер департаментінің қызметіне тексеру жүргізіледі, деп хабарлайды ҚазАқпарат ҚР Ішкі істер министрінің орынбасары Рашид Жақыповқа сілтеме жасап.
«Алматы қалалық Ішкі істер департаменті басшысының жауапкершілігі мәселесіне келсек, қазіргі уақытта ҚР Ішкі істер министрлігі Алматы ІІД қызметіне тексеру жұмыстарын жүргізіп жатыр. ІІД жетекшілігінің жауапкершілігі министрлік деңгейінде осы тексеру нәтижесінде қаралатын болады», - деді Рашид Жақыпов Денис Тен өлімін тергеуге арналған брифингте журналистер сұрағына берген жауабында. 
Айта кетсек, Қазақстандық мәнерлеп сырғанаушы Денис Тен 19 шілде күні пышақ жарақатынан қаза болған еді. Оқиға Құрманғазы Байсейітова көшелерінің қиылысында 19 шілдеде түскі сағат 15:00 шамасында болған. Спортшы көлігінің айнасын ұрламақ болған екі адамның үстінен түскен. Арада басталған жанжалдың салдарынан ұрылар Денис Тенге пышақ сұғып алған. Ол оң жақ санының жоғарғы тұсына жарақат алды. 25 жастағы Тен үш литр қан жоғалтып, ауруханаға өте ауыр жағдайда жеткізілді. Бірақ Алматы қалалық Денсаулық сақтау басқармасының басшысы Серікбол Мусинов қосымша қан қажет еместігін және ресурстар жеткілікті екендігін мәлім еткен болатын.
2,5 сағатқа жалғасқан реанимациялық шараларға қарамастан, аурухана дәрігерлері оның өміріне араша түсе алмады. Сағат 17.30-да Олимпиада жүлдегері қайтыс болды.
Адам өлтіру бабымен қылмыстық іс қозғалды.
Кейін белгілі болғандай, спортшының өліміне қатысы бар екі күдіктінің бірі ұсталып, ол қылмысын мойындады. Екінші күдікті - 1994 жылы туған Қызылорда облысы, Қармақшы ауданы, Ақай ауылының тумасы Арман Құдайбергеновке іздеу жарияланды.
Сондай-ақ, Денис Теннің өліміне күдікті Нұралы Қиясов күзетпен Алмалы аудандық сотына жеткізілген.
Ал Денис Теннің өлімі бойынша күдікті екінші адам Арман Құдайбергенов ұсталды.
