«Алматы-Саратов» пойызынан билеті жоқ 6 жолаушы анықталды
АҚТӨБЕ. ҚазАқпарат - Ақтөбе облыстық мемлекеттік қызмет істері және сыбайлас жемқорлыққа қарсы іс-қимыл департаменті облыстық көліктік бақылау инспекциясы және желілік полиция бөлімі қызметкерлерімен бірлесіп, тексеріс жүргізді. Бұл туралы ведомствоның баспасөз қызметіне сілтеме жасап ҚазАқпарат хабарлайды.
Рейд алыпсатарлар мен билетсіз жүру мүмкіндіктерін жойып, адами фактор әсерін болдырмайтын блоктар жүйесін құруға бағытталған «Адал жол» жобасы аясында ұйымдастырылды.
«Жолаушылар тасымалы» АҚ жолаушылар пойызының 3 жолсерігі әкімшілік жауапкершілікке тартылды. ҚР Әкімшілік құқық бұзушылық туралы Кодексінің 623-бабы 4-тармағына сәйкес, олардың әрқайсысына 2,5 АЕК мөлшерінде айыппұл салынды, сондай-ақ тиісті құжатсыз 170 килограмм қосымша жүк тасымалдағаны анықталды. Қазіргі уақытта жолсеріктерге қатысты шара қабылдау туралы хат «Жолаушылар тасымалы» АҚ «Оңтүстік» аймақтық филиалына жолданған», - дейді облыстық мемлекеттік қызмет істері және сыбайлас жемқорлыққа қарсы іс-қимыл департаментінің өкілі Нұртөре Қалдыбаев.
Жүргізіліп жатқан рейд тұрақты түрде жыл соңына дейін жалғасады.
