Алматыда 700-ден астам мас жүргізуші жазаға тартылды
АЛМАТЫ. ҚазАқпарат - Алматыда мас күйінде рульге отырған жүргізушілер көлік басқару құқығынан айырылып, қамауға алынуда, деп хабарлайды ҚазАқпарат тілшісі.
Жыл басынан бері Алматы қаласының мамандандырылған ауданаралық әкімшілік сотының шешіміне сәйкес, мас күйінде көлік айдаған 711 жүргізуші әкімшілік қамауға алынды. Ал оның 1084-і көлік айдау құқығынан айырылды.
«Бүгінгі таңда мегаполисте апат деңгейі 41,3% -ға азайды. Жалпы, Алматы жолдарында 1 486 жол-көлік оқиғасы тіркеліп, салдарынан 46 адам көз жұмып, тағы екі мыңға жуық адам түрлі дене жарақатын алды. Сондай-ақ, жыл басынан бері жол қозғалысы ережесін бұзған 546 925 жүргізуші анықталды. Қазір қалада көлік қозғалысын қадағалап отыратын автоматтандырылған 105 пост жұмыс істейді. «Сергек» жүйесінің көмегімен 354 083 бұзушылық тіркелді, - дейді Алматы қаласы ДП әкімшілік полиция басқармасының бастығы Жандос Мұраталиев.
