Алматыда «Ақкент» тұрғын үй кешенінде тағы өрт шықты
Алматы қалалық Төтенше жағдайлар департаментінің мәліметінше, бүгін кешкі 19:29 минут шамасында 101 пультіне Алматы қаласы Алатау ауданы Ақкент шағын ауданындағы тоғыз қабатты тұрғын үйден өрт шыққаны туралы ақпарат түсті.
«5-ші қабаттағы пәтердің ас бөлмесінде түтін сорғысы өртеніп, қызыл жалын 0,8 шаршы метрді қамтыды. №2 өрт дәрежесі расталмады. Зардап шеккендер жоқ», - делінген қалалық ТЖД баспасөз қызметінің хабарламасында.
Департамент мамандары азаматтарды өрт қауіпсіздігі ережелерін сақтауға шақырады.
«Құрметті тұрғындар! Асханалық сорғыштағы май шөгінділерінің жануын болдырмау үшін, оны уақытылы тазарту қажет, электр сымдарының қысқа тұйықталуын болдырмау үшін сымдарды арнайы қысқыштар арқылы қосу керек», - деп атап өтті ведомстводан.
Еске сала кетейік, 1 тамыз күні 16 қабатты үйде өрт тұтанғанын хабарлаған едік. Қызыл жалын сағат сол күні 18:46 кезінде оқшауланып, сөндірілді.
31 адам, оның ішінде 16 бала ауруханаға жеткізілген болатын. Амалы қалмаған тұрғындар балаларын терезеден лақтырды.