Алматыда әуежайлардағы шекара қызметтерінің операциялық және сараптамалық іс-қимылдарын жетілдіруге арналған семинар болды

АЛМАТЫ. Ақпанның 20-ы. ҚазАқпарат /Ернар Бекен/ – Бүгін Алматыда әуежайдың шекаралық қызметтерін шекараны кешенді басқаруға оқыту бойынша семинар аяқталды.

Бес күнге созылған семинарға еліміздегі Шекара қызметінің, Кеден комитетінің, сондай-ақ фитосанитарлық және ветеринарлық қызметтерінің 16 өкілі қатысты, деп хабарлайды ҚазАқпарат Қазақстан Республикасындағы Еуропалық комиссия өкілдігіне сілтеме жасап. Бұндай шараны өткізудегі басты мақсат әуежайлардағы шекара қызметтерінің операциялық және сараптамалық іс-қимылдарын жетілдіру болып табылады. Аталмыш кеңесті Халықаралық көші-қон саясатын дамыту орталығы өкілдерінің қолдауымен Еуропалық Одақ және Қазақстан сарапшылары өткізді. Бұл басқосу 2008 жылдың қазан және қараша айларында Бішкек пен Алматыда ұйымдастырылған екі аймақтық тренингтің жалғасы болып отыр.