Алматыда автокөлік айнасын ұрлауды кәсіп еткен екі нашақор ұсталды
Бұрын бірнеше рет қылмыстық жауапкершілікке тартылған олар есірткі үшін жазаларын өтеп шыққан көрінеді.
«Бұл екі азамат бала кездерінен бірге өскен. Екі дос қымбат көліктердің сыртқы айналарын ұрлауды кәсіп еткен. Өздерінің қылмыстық әрекеттерін олар түн қараңғысында жүзеге асырған. Көше бойында қаңтарылған көліктердің айнасын ұрлап, оны саудалап ақшасына есірткі алып жүрген»,- дейді қалалық ішкі істер департаментінің Шолғыншы полиция полкінің командирі Нұржан Нұрғалиев. Оларды Гагарин даңғылының бойында қаңтарылған «Мерседес» автокөлігінің айнасын ұрлау кезінде, осы маңайды шолып жүрген «Боран-026» экипажы құрықтаған. Оқиға орнына келіп жеткен жедел тергеу тобы айғақ заттарды тәркілеп, қылмыстық іске тіркеді. Қазіргі таңда Бостандық аудандық ішкі істер бөлімінің қызметкерлері олардың осы іспеттес басқа да қылмыстарға қатыстылығын тексеруде. Уақытша оқшаулау орталығына қамалғандар өз кінәсін толығымен мойындап отыр.