Алматыда білім беру қызметкерлерінің тамыз кеңесі өтті
деп хабарлайды ҚазАқпарат.
Қала әкімі Ахметжан Есімовтың және ҚР Білім және ғылым вице- министрі Махметқали Сарыбековтың қатысуымен өткен жиынға аудан әкімдері, қаладағы ірі жоғары оқу орындарының ректорлары, жергілікті атқарушы органдар, қалалық мекемелердің басшылары, білім басқармасы, аудандық білім бөлімдерінің қызметкерлері, білім беру ұйымдарының бірінші басшылары, қоғамдық ұйымдар мен мүдделі ведомстволардың өкілдері, сонымен қатар ардагер ұстаздар мен жас мамандар қатысты.
Кеңес қаладағы үздік педагогикалық ұжымдар мен мұғалімдердің озық тәжірибелерін насихаттайтын "Білім сапасын басқару" атты көрмемен және "2009-2010 оқу жылының қорытындылары" атты фильмнің көрсетілімімен ашылды.
Ашылу салтанатында сөз сөйлеген ҚР Білім және ғылым вице-министрі Махметқали Сарыбеков: "Мектептің басты тұлғасы, мектептің жүрегі - ұстаз-мұғалімдер. Біз үшін мектеп білім мен тәрбиенің ортасы, келешектің ашар парағы, ұрпақтар сабақтастығының бір куәсі. "Мектеп - бұл өмір қақпасы, ол қақпадан әр адам өтеді", деп Сухомлинский айтқандай, әркім ол жолдан әр түрлі өтеді. Оның қалай өтетіндігі ұстаздар қауымына байланысты. Шәкірттің қасында кім тұрады, кім қандай бағыт-бағдар береді, кім қандай ақыл-кеңес айтады бәрі соған байланысты. Олай болса, қазіргі таңда мектепке білімді, Ахмет пен Мағжанның педагогикасын сусындағын, жаңа оқу әдістемелері мен технологияларынан хабары бар, шәкіртін бәсекелестік кеңістігіне шығара алатын сіздердей білімді мамандар қажет", деп атап өтті.
Кеңес барысында Алматы қаласы білім басқармасының бастығы Райхан Шимашева соңғы бір жылда қаладағы білім беру саласында атқарылған жұмыстарды қорытындылады.
Кеңесте сөз алған әкім білім беру саласында алдағы жылдары қолға алынғалы отырған шараларға тоқтала келе, «Мектептің гүлденгені- қаламыздың гүлденгені» қалалық байқаудың нәтижелері бойынша 6 білім беру ұйымдарына, жалпы білім беретін пәндер бойынша халықаралық, республикалық олимпиадалар мен ғылыми жарыстардың жеңімпаздарын дайындаған 78 ұстазды марапаттап, қала әкімінің сыйақысын табыс етіп, тұрғын үй кезегінде тұрған 3 ұстазға пәтерлердің ордерлерін табыс етті. Сонымен қатар, қаланың үздік педагогтары ҚР Білім және ғылым министрлігінің төсбелгілерімен және Алматы қаласы әкімінің Құрмет грамоталарымен марапатталды. Кеңесте сондай-ақ, білім беру саласының ардагерлері де марапатталды.
Жиынның пленарлық мәжілісі "Алматы - менің қалам" атты концерттік бағдарламамен аяқталды. Концерт барысында білім саласының қызметкерлерін еліміздің өнер қайраткерлері де құттықтады.