Алматыда қару-жарақ дүкенін тонады деген күдікпен ер адам ұсталды
Алматы қалалық полиция департаментінің баспасөз қызметі хабарлағандай, Алматыда Қаламбаев көшесіндегі үйлердің бірінің жанында екі мылтық пен патрон салатын қалта көмілген болып шықты.
«Алматыда ағымдағы жылдың қаңтар айының 5-нен 6-на қараған түні қару-жарақ дүкенінен қару ұрлаған азамат ұсталды. Ол 1994 жылы туған С. есімді азамат болып шықты. Ол криминалдық полиция қызметкерлерінің жедел іздестіру іс-шаралары барысында қолға түсті. Айғақ зат ретінде тұрғын үй маңына көмілген қару-жарақ пен оқ-дәрі тәркіленді. Атап айтқанда, «Remington» мылтығы, «Benelli» тегіс ұңғылы мылтығы, екі патрон салатын қалта мен сегіз патрон тәркіленді. Күдікті кінәсін мойындап, қылмысты қалай жасағанын айтып берді. Қылмыстық іс тергелуде», - деді Алмалы аудандық полиция басқармасының бастығы, полиция полковнигі Есен Ысқақов.
Еске салайық, бұған дейін ІІМ өкілі қаңтар қырғынында ұрланған 1 386 қару-жарақтың табылғанын хабарлаған болатын.