Алматыда қазақтану туралы халықаралық ғылыми-теориялық конференция болады

АЛМАТЫ. 6 қараша. ҚазАқпарат - Алматыда 9 қарашада «Бар қазақ - бір қазақ: діни-мәдени аспектілері» ғылыми-зерттеу жобасы аясында «Қазақтану және ұлттық инновация» деген тақырыпта халықаралық ғылыми-теориялық конференция өтеді. Ол әл-Фараби атындағы Қазақ ұлттық университетінің 80 жылдығы мен еліміздегі «қазақтану» ілімінің негізін қалаушылардың бірі, философия ғылымдарының докторы, Қазақстанның әлеуметтік ғылымдар академиясының және Халықаралық акмеологиялық ғылымдар академиясының академигі Жақан Молдабековтің 70 жылдық мерейтойына арналып отыр.

Жақан Жанболұлы - қазақтану және жаңару философиясы мәселелерінің әдістемелік негіздерін, сонымен бірге ұлттық тәрбиенің тәлімдік өнегелері және қазақ ақын-жырауларының, би-шешендерінің дүниетанымы мен философиясы төңірегінде көптеген ғылыми-зерттеу жұмыстарын жүргізген 600-ден артық ғылыми еңбектердің авторы. Әл-Фараби атындағы ҚазҰУ-дың Философия және саясаттану факультетінің Дінтану және мәдениеттану кафедрасының профессоры 2008-2009 жылдары іргелі ғылыми ізденістері үшін президенттік гранттың иегері, 2009 жылы «әл-Фараби атындағы ҚазҰУ-дың ең үздік оқытушысы» атанды. 2010 жылы ҚР Білім және ғылым министрлігінің «Жоғары оқу орындарының ең үздік оқытушысы» атағын иеленіп, 2011жылы «Шешендік» оқу құралына «Ы. Алтынсарин атындағы» сыйлық берілді.