Алматыда коронавирус вакцинасын алғандар саны 700 мыңға жуықтады
Бұл жайында өңірлік коммуникациялар қызметінде өткен брифингте Алматы қоғамдық денсаулық сақтау басқармасының басшысы Нариман Табынбаев айтты.
Оның мәліметіне сенсек, өткен тәулікте 5 001 адам вакцина салдырған. 60 жастан жоғары вакцина алған адамның саны - 96 553.
«Бізде Sinovac-қа үлкен сұраныс бар. Қазақстан Республикасы Денсаулық сақтау министрлігі келіссөз жүргізді. Жақын арада Sinovac вакцинасын жеткізу туралы ақпарат алдық», – деп қорытындылады сөзін Алматы қаласы қоғамдық денсаулық басқармасының басшысы.
ҚДСБ басшысы Алматының барлық тұрғындарын тез арада КВИ-ге қарсы вакциналауға шақырды.
Өйткені бұл - қауіпті аурудың тез таралуына төтеп берудің жалғыз жолы.
Еске салсақ, Алматыда екпе пунктілерінің кең желісі ашылған және күн сайын 15-20 мыңға дейін екпе жүргізуге мүмкіндік бар.
1 ақпан мен 27 шілде аралығында Алматыда екпенің I компонентін 690 711 адам алған.