Алматыда полицияға тоқтамай көлігімен қашқан жүргізушіге 15 әкімшілік хаттама толтырылды
АЛМАТЫ. ҚазАқпарат - Алматыда жүргізуші куәлігі жоқ азамат полицейлерден қашып құтылмақ болды, деп хабарлайды ҚазАқпарат тілшісі.
Әлеуметтік желіде бір көшеде көптеген патрульдік көліктің тұрған видеосы жарияланды. Куәгерлердің айтуынша мұнда шамамен 20-ға жуық машина келген.
Қалалық Полиция департаментінің өкілдері бүгін таңертең әл-Фараби даңғылы мен Ғ.Мұстафин көшесінің қиылысында «Mercedes» көлігінің жүргізуші қатты жылдамдықпен қауіпті маневрлер жасағанын айтты.
«Жүргізуші полиция қызметкерлерінің көлікті тоқтату жөніндегі ескертуін елемей, керісінше, жылдамдықты қоса түскен. Осыған байланыстың оның соңына бірнеше полиция көлігі түсіп, көлікті қоршауға алып, оның одан әрі қозғалысына жол бермеді. Рульде 1992 жылы туған азамат болды. 2020 жылы қыркүйекте мас күйінде көлік жүргізгені үшін сот жүргізуші куәлігінен бір жарым жылға айырғаны белгілі болды. Бүгін дәрігерлер оның есірткіге масаң күйде болғанын растады. Аталған дерек бойынша ҚР Қылмыстық кодексінің 346-бабы бойынша сотқа дейінгі тергеу басталды. Күдікті ұсталып, уақытша ұстау изоляторына қамалды», - деді Алматы қаласы ІІД тергеу басқармасыың бастығы Олжас Шәріпов.
Сонымен қатар, жергілікті полиция басқармасының бастығы Манап Саттаров оған қатысты 15 әкімшілік хаттама толтырылғанын мәлім етті.
