Алматыда жеке су құбырлары мен су ұңғымаларын коммуналдық меншікке беру ұсынылды
«Ведомствалық және жеке су құбырлары мен су ұңғымалары қазір үлкен мәселе болып отыр. Өйткені, олар санитарлық-эпидемиялогиялық талаптарға жауап бере алмайды. Тұрғындарды сумен қамтамасыз ету мәселесінің маңыздылығын ескере отырып, қаланың санитарлық-эпидемиялогиялық қызметі ведомствалық және жеке су құбырлары мен су ұңғымаларын «Алматы Су холдингі» мемлекеттік коммуналдық кәсіпорнынының балансына беруді ұсынды», - делінген департаменттің хабарламасында.
Айта кетелік, 2015 жылдың қорытындысы бойынша, қалада жұқпалы індеттердің су арқылы берілуі фактісі анықталған жоқ. Тұрғындар тарапынан бұл жөнінде арыз-шағым түскен жоқ.
2015 жылы Алматы қаласының Алатау ауданында орналасқан Ақбұлақ ықшам ауданында ұзындығы 19 шақырым болатын су құбыры желісі салынды. Ол 2016 жылдың бірінші тоқсанында қалалық желіге жалғанады. Сондай-ақ, Ақбұлақ ықшам ауданының оңтүстік бөлігінде тұратын тұрғындар үшін ұзындығы 16 шақырым болатын жаңа су құбыры желісінің жоба-сметалық құжаттамасы әзірленді
Бұдан басқа, Алатау ауданындағы Көк-Қайнар ықшам ауданының солтүстік-батыс жағында 16,1 шақырымдық су құбыры желісі тартылды. Ол да қалалық желіге 2016 жылдың бірінші тоқсанында жалғанады.