Алматыда жүк вагондары жанармай бекеті аумағына құлап, тұрғындар эвакуацияланды

АЛМАТЫ. ҚазАқпарат - Алматыда жүк вагондарының жанар-жағармай бекетінің аумағына аударылуы салдарынан жақын маңдағы тұрғындар қауіпсіз жерге көшірілді, деп хабарлайды ҚазАқпарат тілшісі ТЖД баспасөз қызметіне сілтеме жасап.

Алматы қаласы бойынша Төтенше жағдайлар департаментінен мәлім еткендей, 101 басқару пультіне сағат 14.20-да Жетісу ауданы Бөкейханов көшесінде жүк вагоны жанар-жағармай бекетіне құлағаны туралы ақпарат келіп түскен.

«Бөкейханов көшесі 21 «Б» мекенжайында орналасқан «ҚазТемірТранс» компаниясының «Станционный» теміржол бөлігінде жүк вагондары рельстен шығып кеткені туралы хабар келіп түсті. №410-шы жолдан екі жүк вагоны Гелиостың №73-ші жанар-жағармай бекеті аумағына құлағаны анықталды. Жүк вагонының бірі бос. Сол бос вагон қазір жанар-жағармай бекетінің бензин мен дизель отыны сақталған жерасты қоймасының үстінде жатыр. Екінші вагонда қара түсті металдар бар. Оқиға орнына жақын маңдағы ескі үйлерден 30 адам эвакуацияланды, оның 5-еуі бала. Аудан босатылды. Вагондарды сүйреп шығару үшін апаттық-қалпына келтіру пойызы шақыртылды. Қауіпсіздікті қамтамасыз ету мақсатында оқиға орнына 4 өрт сөндіру көлігі шақыртылды», - делінген хабарламада.

Оқиғаға байланысты аудан әкімінің басшылығымен штаб құрылды. Оның құрамына Алматы қаласы бойынша ТЖД, Теміржол басшылығы, «Гелиос» жанар-жағармай бекеті желісінің өкілдері, ҚР ІІМ ТЖК, Алматы қаласы бойынша құтқару қызметінің өкілдері кірді.

ТЖД баспасөз қызметінің хабарлауынша, қазір вагондарды қауіпсіздік шараларын сақтай отырып, жанар-жағармай бекеті аумағынан шығарып алу мәселесі талқылануда.