Алматыдағы Балалар үйінде тәрбиеленушілердің ел Тәуелсіздігінің 20 жылдығына арнаған сурет көрмесі ашылды

; АЛМАТЫ. 10 желтоқсан. ҚазАқпарат /Нәзира Елеухан/ - Бүгін Алматыда Оқушылар сарайында ел Тәуелсіздігінің 20 жылдығына орай "Арман үй- балалар көзімен" атты әлеуметтік жоба аясында Алматы қаласындағы Жетім балалар үйінде тәрбиеленуші балдырғандардың сурет көрмесі ашылды.

Көрмеге №8-ші, 2-ші, 1-ші және "Жанұя" мен "Ковчег" Балалар үйінде тәрбиеленуші балалардың "Арман үйі", "Тәуелсіздікке 20 жыл", "Жаңа жыл" тақырыбында салған 100-ден аса туындылары мен қолдан жасалған дүниелері қойылған. Көрме жұмысы желтоқсанның 14-не дейін жалғасады.

Естеріңізге сала кетсек, әлеуметтік жоба қарашаның 7-сі күні бастау алған болатын. Ұйымдастырушылардың айтуынша, жоба 14 желтоқсан күні Қазақстан эстрада жұлдыздарының қатысуымен өтетін қайырымдылық концертпен аяқталады.

Шараны ұйымдастырушылар - "Нұр Отан" ХДП, қала әкімдігі мен Алматы қаласының Білім басқармасы және Оқушылар сарайы.