Алматыдағы Қарасу көлінің табаны алғаш рет тазартыла бастады

АЛМАТЫ. ҚазАқпарат – Алматыдағы Қарасу көлін тазарту жұмыстары басталды. Бұл туралы Ерболат Досаев Алатау ауданы тұрғындарымен кездесуі барысында мәлім етті, деп хабарлайды ҚазАқпарат тілшісі.

Қала басшысының сөзінше, Алатау ауданында үнемі су басатын жерлердің мәселесі толық шешілді. 18 учаскенің 16-сында жұмыстар орындалды, қалған 2 учаске бойынша жақында аяқталады.

«Сонымен қатар, биыл біз Қарасу көлін механикалық тазарту жұмыстарын бастадық. Бұл көл алғаш рет тазартылып жатқанын атап өткім келеді. Жұмысты осы жылдың қыркүйек айында аяқтаймыз», - деді Ерболат Досаев.

Бұған дейін Есентай өзенінің арнасын балшық, шөгінді, тас және қоқыстан тазарту жұмыстары жүргізіліп жатқаны туралы жазған болатынбыз.