Алты робот құмырсқа бірігіп автокөлікті орнынан жылжытты
АСТАНА. ҚазАқпарат - АҚШ-тың Стэнфорд университетінің ғалымдары өзінен салмағы мыңдаған есе ауыр заттарды орнынан жылжыта алатын кішкентай роботтар жасап шығаруды ұйғарды. Америкалық мамандар ол үшін құмырысқаларды негізге алып табиғаттан көшірді.
Авторлардың сөздеріне қарағанда, олар қарулы механизмдер емес керісінше бір мезгілде жұмыла әрекет ететін синхронды құртақандай роботтар жасауға ден қойды.
Нәтижесінде әрқайсысының салмағы 100 грамм ғана алты шағын робот салмағы 1,5 тоннадан асатын автомобильді орнынан қозғалта алды, деп жазды The New York Times.
Ғалымдар мұны - алты адамның бірлесіп Эйфель мұнарасын орнынан қозғалтуымен бірдей деп санайды.
