Алты жылда еліміздегі 170 шақты аурухананың медициналық техникасы жаңартылды

АСТАНА. ҚазАқпарат - 2010 жылдың қарашасынан 2016 жылғы қазанға дейін ҚР Денсаулық сақтау және әлеуметтік даму министрлігінің «ҚазМедТех» АҚ көмегімен 167 денсаулық сақтау ұйымында медициналық техника жаңартылды. Осы кезеңде лизингке 500 астам бірлік медициналық техника сатып алынды, деп хабарлайды министрліктің баспасөз қызметі.

«ҚазМедТех» АҚ тек осы жылы лизингке медициналық техника алуға 225 өтінімді мақұлдады. 2016 жылдың басынан бастап республиканың денсаулық сақтау ұйымдарында 61 бірлік медициналық техника орнатылды, жылдың сонына дейін тағы 27 орнатылатын болады. 137 бірлік медициналық техника келесі жылы емханалар мен ауруханаларға жеткізіледі.

Қазақстанның өңірлері арасында медициналық техниканы лизингке алу жүйесін Павлодар облысының медициналық ұйымдары белсенді пайдалануда. Кейінгі 6 жылда өңірдің 12 ұйымы 70 бірлік медициналық техниканы сатып алуға қаржылық лизинг шартына қол қойды.

«ҚазМедТех» АҚ 2010 жылы мемлекеттік және жеменшік медициналық ұйымдарын лизинг арқылы заманауи медициналық техникамен жабдықтау мақсатында құрылғанын естеріңізге саламыз.

Медициналық техниканы лизинг жүйесімен сатып алу - алынған жабдықтарды тиімді пайдалануға және әрбір аурухананың бейініне байланысты сұранысын қанағаттандыруға бағытталған.