Аляска штатындағы жоғалған ұшақ іздестіріліп жатыр
АСТАНА. KAZINFORM - Америка билігі Аляска штатында із-түзсіз жоғалып кеткен ұшақты іздестіріп жатыр. Ұшақ бортында 10 адам болған, деп хабарлайды ВВС.
Аляска аймағындағы АҚШ жағалау күзетінің хабарлауынша, Bering Air компаниясына тиесілі Cessna Caravan ұшағы Уналаклита мен Ном бағытында байланыстан ажырап қалған кезде жағалаудан 19 км қашықтықта болған.
Екі қала бір-бірінен шамамен 235 км қашықтықта орналасқан.
- Бортта 10 адам болған. 9 жолаушы мен ұшқыш, - деп хабарлады Аляска қоғамдық қауіпсіздік департаменті.
Айта кетейік, қаңтар айының соңында Вашингтондағы Рональд Рейган әуежайының маңында жолаушылар ұшағы мен тікұшақ ауада соқтығысып, Потомак өзеніне құлаған болатын. Салдарынан 67 адам қаза тапты.
Ақпан айының басында Филадельфияның солтүстік-шығысында медициналық эвакуация ұшағы әуеге көтерілгеннен кейін көп ұзамай апатқа ұшырады. Борттағы алты адам мен жердегі көлікте болған бір адам қаза тапты.
