Аляскадағы ресейлік және америкалық делегаттар студенттік жатақханаларға орналастырылды

АСТАНА.KAZINFORM — Аляска штатының Анкоридж қаласында өтетін Ресей-АҚШ саммитіне келген ресейлік және америкалық делегациялардың бір бөлігі қонақүйдегі орын тапшылығына байланысты жергілікті университеттің жатақханасына орналастырылды, деп хабарлайды Alaska News Source. 

Алясканың Анкоридж университеті (UAA) ресейлік және америкалық делегаттардың кампустағы жатақханаларға орналастырылғанын мәлімдеді.

— Жатақханалардан басқа, бізде төсек-орындары бар Alaska Airlines орталығы бар, онда ресейлік делегация орналастырылды, — деді Райан Буххольдт, UAA әкімшілік істер жөніндегі вице-канцлері.

Буххольдт университет полициясы қауіпсіздікті қамтамасыз ету үшін штат пен федералды құқық қорғау органдарымен тығыз жұмыс істеп жатқанын айтты.

— Біздің басты мақсатымыз — Америка Құрама Штаттарынан, Ресейден немесе кез келген басқа аймақтан болсын, кампустағы барлық адамның қауіпсіздігін қамтамасыз ету, — деді Буххольдт.

Қазіргі уақытта Анкориджде қонақүй бөлмесіне тапсырыс беру немесе көлікті жалға алу мүмкін емес. Аляска танымал жазғы туристік бағыт болғандықтан, осы маусымда қонақүйлер мен жалға берілетін көліктерге сұраныс әрқашан жоғары. Оның айтуынша, қала билігі делегаттарды орналастыру үшін «креативті шешімдер» іздеуі керек.

Айта кетейік, Владимир Путин мен Дональд Трамп 15 тамызда Аляскада кездеседі.