Әмір Омарханов Мексикадағы турнирдің жартылай финалына шықты

АСТАНА. KAZINFORM — Қазақстанның 18 жасқа дейінгілер арасында бірінші ракеткасы, жасөспірімдердің әлемдік рейтингісінде 19-орында тұрған Әмір Омарханов бірінші санаттағы Мерида (Мексика) ITF Juniors J500 турнирінің жартылай финалына жолдама алды.

Қазақстандық теннисші ширек финалда жасөспірімдер арасында әлемнің 49-ракеткасы, америкалық Бенджамин Вилаерттің мысын басты.

Екі сет те 6:3, 6:3 есебімен Әмірдің пайдасына шешілді.

Әмір Омарханов финалға шығу үшін жасөспірімдер арасында әлемнің 28-ракеткасы, франциялық Томас Фурелмен таласады.

Еске сала кетейік, бұдан бұрын теннистен әлемнің экс 1-ракеткасы допинг дауына іліккенін жазған болатынбыз.

Сондай-ақ қазақстандық теннисші Мысырдағы жарыстың жартылай финалына өтті.

Сандуғаш Кенжебаева чехиялық Ивана Себестовамен бірге Шарм-эль-Шейх (Мысыр) ITF W15 турнирінің жартылай финалында тартысты матчта нидерландылықтар Лус Эбелинг Конинг – Сара Ван Эмстке жол берді – 6:1, 5:7, 7:10.