Әмір Омарханов Тунисте өтіп жатқан турнирдің ширек финалына шықты

АСТАНА. KAZINFORM — Әмір Омарханов ATP рейтингісінде 1036-орында тұрған қазақстандық теннисші, Тунистің Монастир қаласында өтіп жатқан ITF санатындағы турнирдің ширек финалына жолдама алды.

Турнирдің жүлде қоры – 15 мың АҚШ доллары.

Омарханов екінші айналымда италиялық Лука Констаньоланы (ATP 738) 7:5, 6:2 есебімен сенімді түрде жеңді.

Ширек финалда Әмір франциялық Шарль Бертимонмен (ATP 1343) немесе турнирдің бірінші ракеткасы саналатын германиялық Том Гентцпен (ATP 472) кездеседі. Бұл ойын ертең, 28 ақпан күні түстен кейін өтеді.

Еске сала кетейік Әмір Омарханов Тунистегі турнирдің 1/8 финалына жолдама алған еді.