Андрей Гореглядтың 1 жыл бұрын үзіліп қалған қолы әлі біткен жоқ
Павлодар қалалық №1 аурухананың хирургі Сәбит Жүсіповтің айтуынша, жас жігіттің қол сүйегі толық бітпеген, деп хабарлайды pavlodarnews.kz.
«Андрей қазір біздің аурухананың бақылауында. Сынығын таңғызу үшін келіп жүр. Оған енді жүйке талшықтарын қалпына келтіру бойынша ота дәл қашан және қайда жасалатыны туралы ешнәрсе айта алмаймыз. Негізі біз бұл отаны ертерек жасауды жоспарлаған болатынбыз. Бірақ сүйек уақытында тез бітіп кетеді деп ойлаған едік. Алайда оның сүйегінде тесік барын жазда байқадық. Соның салдарынан остеомелит тарап кеткен. Алдағы уақытта отаның келесі сатысын жоспарлайтын боламыз» - дейді Сәбит Жүсіпов.
Еске сала кетейік, осыдан бір жылдан астам уақыт бұрын, яғни қазан айының 7-сінде Андрей Горегляд жұмыс орнындағы конвейерлік таспаны қозғалту барысында құлап жарақат алған болатын. Бес сағатқа созылған күрделі ота нәтижесінде иық сүйегі, тамырлары және сіңірлері мен бұлшық еті қалпына келді. Бұдан әрі жас жігіт физиоемдеу курсынан өтіп, жүйке талшықтарын қалпына келтіру отасын жасату керек болған.