Анна Данилина Дубай WTA 1000 турнирінің екінші айналымына өтті

ДУБАЙ. KAZINFORM - Қазақстанның жұптық сындағы бірінші ракеткасы Анна Данилина Дубай WTA 1000 турнирінің екінші айналымына өтті.

Қазақстандық теннисші қытайлық Чжан Шуаймен бірге бастапқы кездесуін бразилиялық Ингрид Гамарра Мартинс - украиналық Надежда Киченокпен өткізді. Қазақстандық-қытайлық жұп 6:4, 6:3 есебімен жеңіске жетті.

Бір сағат 15 минутқа созылған матчта олар 4 эйспен бірге 9 брейк-пойнттың төртеуін пайдалана білді. Қарсыластары 2 эйс, 2 брейкпен (5 брейк-пойнт) шектелді.

Анна Данилина - Чжан Шуай ширек финалға шығу үшін жарыстың 2-ракеткалары, канадалық Габриэла Дабровски - жаңа зеландиялық Эрин Рутлифпен таласады. 

Еске сала кетейік, бұдан бұрын Елена Рыбакинаның Доха турнирінің финалында әлемнің 1-ракеткасына жол бергенін жазған болатынбыз.