Анна Данилина Қытайдағы жарыстың ширек финалына жолдама алды

АСТАНА. KAZINFORM – Қазақстанның жұптық сындағы бірінші, әлемнің 31-ракеткасы Анна Данилина Ухань (Қытай) WTA 1000 турнирінің ширек финалына жолдама алды.

А.Данилина ресейлік Ирина Хромачевамен бірге екінші айналымда испаниялық Кристина Буча – румыниялық Моника Никулескудің мысын басты.

Бірінші партияда испаниялық-румыниялық дуэт 6:4 есебімен басым түсті.

Екіншісінде қазақстандық-ресейлік жұп қарсыластарына еш мүмкіндік берген жоқ – 6:0.

Содан кейін супер тай-брейкте жеңісті жұлып алды – 10:8.

Сағат жарымға жуық уақытқа созылған бәсеке барысында Данилина – Хромачева эйс жасамағанымен, 7 брейк-пойнттың төртеуін пайдаланды. Буча – Никулеску 2 брейкпен (14 брейк-пойнт) шектелді.

Анна Данилина – Ирина Хромачева жартылай финалға шығу үшін жарыстың 1-ракеткалары, канадалық Габриэла Дабровски – жаңазеландиялық Эрин Рутлифпен таласады.

Еске сала кетейік, бұдан бұрын Юлия Путинцеваның Қытайдағы турнирде Олимпиада жүлдегерін жеңгенін жазған болатынбыз.