Анна Данилина Мексикадағы турнирдің финалына шығу үшін таласады

АСТАНА. KAZINFORM – Қазақстанның жұптық сындағы бірінші, әлемнің 18-ракеткасы Анна Данилина Мерида (Мексика) WTA 500 турнирін сәтті өткізуде.

Ресейлік Ирина Хромачевамен бірге жарыстың 1-ракеткасы болып тіркелген қазақстандық теннисші бастапқы кездесуінде ұлыбританиялық Эмили Эпплтон – америкалық Куинн Глисонның мысын басты – 6:3, 6:4.

Қазақстандық-ресейлік жұп ширек финалда украиналықтар, апалы-сіңлілі Марина және Надежда Колбтармен шеберлік байқасты. Бірінші партияда Данилина – Хромачева 6:2 есебімен басым түсті. Екінші сетте есеп 3:2 болған мезетте украиналық дуэт медициналық көмекке жүгініп, матчты жалғастырудан бас тартты.

Анна Данилина – Ирина Хромачева жүлде қоры 1 млн АҚШ долларынан асатын доданың финалына шығу үшін турнирдің 3-ракеткалары, мажарстандық Тимея Бабош – америкалық Николь Меличармен таласады.

Еске сала кетейік, бұдан бұрын Дубай турнирінде Юлия Путинцеваның жарыс жолынан шығып қалғанын жазған болатынбыз.