Анна Данилина жұптық сында Рим мастерс турнирінің ширек финалына шықты

АСТАНА. ҚазАқпарат – Қазақстанның жұптық сындағы бірінші, әлемнің 26-ракеткасы Анна Данилина Рим WTA 1000 турнирінің ширек финалына шықты, деп хабарлайды ҚазАқпарат тілшісі.

Қазақстандық теннисші мажарстандық Тимея Бабошпен бірге екінші айналымда әлемнің бұрынғы 1-ракеткасы, Беларусь өкілі Виктория Азаренко – бразилиялық Беатрис Хаддад Майямен кездесуі тиіс еді.

Алайда В.Азаренконың жарақатына байланысты қарсыластары матчқа келмей қалды да, қазақстандық-мажарстандық жұп ойнамастан ширек финалға өтті.

А.Данилина мен Т.Бабош жартылай финалға шығу үшін жарыстың 4-ракеткалары, аустралиялық Сторм Сандерс – бельгиялық Элиза Мертенспен таласады.

Еске сала кетейік, бұдан бұрын Александр Бубликтің Римде әлемнің төртінші ракеткасына жол бергенін жазған болатынбыз.

Елена Рыбакина Рим мастерс турнирінің төртінші айналымына өтті.