Антониу Гутерриш барша елді БҰҰ-ны қолдауға шақырады
АСТАНА. KAZINFORM – Бүгін - халықаралық бейбітшілік пен қауіпсіздікті сақтауға, халықтар арасындағы достық қатынастарды дамытуға, халықаралық ынтымақтастыққа қол жеткізуге және мемлекеттердің іс-әрекеттерін үйлестіру орталығы болуға бағытталған Біріккен Ұлттар Ұйымы күні. Осы орайда, Kazinform БҰҰ Бас хатшысы Антониу Гутерриштің жолдауын ұсынады.
«Біріккен Ұлттар Ұйымын бүкіл әлем құрды және ол бүкіл әлем үшін құрылды. 1945 жылдан бері ол - елдердің жаһандық мәселелердің шешімін табу үшін бірігетін орны. Бұл – шиеленісті басуға, көпір орнатып, бейбітшілікті нығайтуға септігін тигізетін шешімдер. Бұл – кедейлікті жою, тұрақты дамуға ынталандыру және халықтың ең осал топтарын қорғау шешімдері. Бұл - қақтығыс, зорлық-зомбылық, экономикалық қиындықтар және климаттық апаттар жағдайында өмір сүріп жатқан адамдарға өмір үшін қажетті көмек көрсету шешімдері. Бұл – әйелдер мен қыздар үшін әділдік пен теңдік таразысын теңестіретін шешімдер. Бұл – 1945 жылы елестету мүмкін емес мәселелерді қамтитын шешімдер – климаттың өзгеруі, цифрлық технологиялар, жасанды интеллект және ғарыш кеңістігі.
Қыркүйек айында Бас Ассамблея «Болашақ үшін» пактіні, Жаһандық цифрлық шартты және Болашақ ұрпақ туралы декларацияны қабылдады. Бұл маңызды келісімдер жинағы Біріккен Ұлттар Ұйымы жүйесінің айналамыздағы өзгерістер мен сын-қатерлерге сай болып, барлығы үшін шешімдер шығаратындай бейімделуін, реформалануын және жасаруын қамтамасыз етуге көмектеседі.
Бірақ біздің жұмысымыз әрқашан Біріккен Ұлттар Ұйымының Жарғысында және халықаралық құқық нормаларында бекітілген құндылықтар мен қағидаттарға және әрбір адамның қадір-қасиеті мен құқықтарын құрметтеуге негізделеді.
Қазіргі қиын заманда жалғыз үміт аздық етеді. Үміт бейбітшілік, ортақ әл-ауқат пен ғаламшардың гүлденуін қамтамасыз ету үшін шешуші әрекет пен көпжақты шешімдерді талап етеді. Үміт барлық елдің жұмыла әрекет етуін талап етеді. Үміт Біріккен Ұлттар Ұйымын талап етеді.
Біріккен Ұлттар Ұйымы күні мен барлық елді бүкіл әлем мен ол бейнелейтін идеалдар үшін бағдар болып отырған осы шамшырақты жарқыратып ұстауға шақырамын», - делінген жолдауда.
Жуырда Мемлекет басшысы Қасым-Жомарт Тоқаев Астанада өткен Astana Think Tank форумының пленарлық отырысында «Біріккен Ұлттар Ұйымын нығайту керек» деген сенімде екенін айтқан еді. «Өйткені оның орнын басатын ұйым жоқ. БҰҰ-да көптеген кемшілік болғанымен, бізде басқа балама жоқ. Сондықтан Қазақстан БҰҰ рөлін нығайту бойынша осындай ұстанымдағы барлық елмен ынтымақтаса беруге ниетті», - деді Президент.
Еске салайық, Нью-Йорктегі БҰҰ Бас Ассамблеясы 79-шы сессиясының жоғары деңгейдегі апталығы аясында Қазақстан Республикасы Премьер-Министрінің орынбасары – Сыртқы істер министрі Мұрат Нұртілеу Біріккен Ұлттар Ұйымының Бас хатшысы Антониу Гутерришпен кездесіп, ҚР мен БҰҰ ынтымақтастығының келешегін талқылаған болатын.
Айта кетсек, Ұйымға «Біріккен Ұлттар» атауын беруді АҚШ Президенті Франклин Делано Рузвельт ұсынған. Декларациясы Сан-Францискода 1945 жылы 24 қазанда қабылданып, сол күн БҰҰ күні деп жарияланады. Әлемдегі ең ірі, халықаралық деңгейде ұсынылған және ең қуатты үкіметаралық ұйымның Бас кеңсесі Нью-Йоркте орналасқан.
