АӨСШК сарапшысы референдум туралы пікір білдірді

АСТАНА. KAZINFORM – Азиядағы өзара іс-қимыл және сенім шаралары кеңесі (АӨСШК) сарапшысы, елші Исмат Джахан ханым Халықаралық байқаушыларға қолғабыс көрсету орталығында өткен брифингте референдум барысы туралы пікір білдірді.

Оның айтуынша, әріптестерімен бірге үш сайлау учаскесінде болып, дауыс беру процесін бақылаған. Елші учаскелердегі жалпы ахуалдың жақсы ұйымдастырылғанын атап өтті.

- Біз барған учаскелерде дауыс беру процесі жақсы деңгейде ұйымдастырылған. Азаматтар өз дауыстарын беріп, учаскелерден тыныш әрі тәртіппен шығып жатты, – деді Исмат Джахан.

Сондай-ақ ол дауыс беруге келген азаматтардың белсенділігіне назар аударды. Оның сөзінше, кейбір отбасылар дауыс беруге балаларымен бірге келген.

- Тіпті кішкентай балалардың да ата-аналарымен бірге келгенін көрдік. Бұл жас ұрпаққа саяси құқықтарды жүзеге асырудың маңызын көрсетеді, – деді ол.

Елші референдумды ұйымдастыруға жауапты комиссияның жұмысына жоғары баға берді. Оның айтуынша, дауыс беру учаскелерінде мүмкіндігі шектеулі азаматтарға да қажетті жағдай жасалған.

- Біз барған үш учаскенің әрқайсында бірнеше дауыс беру кабинасының бірі мүмкіндігі шектеулі жандарға арналған. Бұл – өте маңызды, – деп атап өтті Исмат Джахан.

Сонымен қатар ол халықаралық байқаушыларды шақырғаны үшін Қазақстан билігіне алғыс білдірді.

- Жалпы әсерім өте жақсы. Бізді байқаушы ретінде шақырып, жағдаймен танысуға мүмкіндік бергені үшін тиісті органдарға алғыс айтамын, – деді елші.

Бұған дейін әзербайжандық саясаттанушы Заур Мамедовтің пайымынша, Қазақстанда 15 наурызда өтетін референдум елдің саяси эволюциясының келесі маңызды кезеңі әрі мемлекеттік басқару жүйесін жаңғырту бағытының заңды жалғасы саналады.