Арал Садықов Қазақстан таеквондо федерациясының бас хатшысы болып тағайындалды

АСТАНА. KAZINFORM — Қазақстан таеквондо федерациясының бас хатшысы болып Арал Садықов тағайындалды. Бұл туралы Prokadry жазды.

Бұған дейін ол Қазақстан таеквондо федерациясының бірінші вице-президенті болған. 

Ал, былтыр Қазақстандық таеквондо (WT) федерациясының президенті Вячеслав  Ким басшы қызметінен кетіп, орнына Шамиев Құдырет Игнатұлы сайланған болатын.

Биылғы қаңтарда Есбол Сұлтанов таеквондодан Қазақстан құрамасына бас бапкер болып тағайындалды. Ол – Париж Олимпиада ойындарында Тунис елінің ұлттық құрамасын басқарып, екі медаль жеңіп алған болатын. 

Федерация президенті Құдырет Шәмиев ұйымның да, команданың алдында да үлкен міндеттер тұрғанын алға тартып, келесі төрт жыл 2028 жылғы олимпиадаға дайындық болса, одан кейінгі ойындарға жастарды жетілдіруді мақсат еткенін айтқан болатын.

Биыл Қазақстан таеквондо федерациясында үлкен өзгерістер болды. Федерацияның құрамы толықтай өзгерді. Бапкерлердің де, төрешілердің де құрамы ауысты.

Қазақстан таеквондодан 2027 жылғы әлем чемпионатын қабылдауға дайындалып жатыр.

Еске сала кетейік, бұған дейін отандық WT таеквондо федерациясының президенті Құдырет Шәмиев Kazinform тілшісіне сұқбат беріп, 2027 жылы таеквондодан әлем чемпионатын өткізуге күш салып жатқанын айтқан болатын. Алдағы жоспарларымен бөліскен еді.