Арал теңізінде ығып кеткен 2 балықшыны үш күннен бері таба алмай жатыр

АРАЛ. ҚазАқпарат - Қызылорда облысы Арал теңізі аумағында балық аулауға шыққан екі балықшы үш күннен бері табылмай жатыр, деп хабарлайды ҚазАқпарат тілшісі.

Екі балықшы жергілікті «Бақыт» шаруа қожалығында еңбек етеді. Балық аулау ісін кәсіп еткен 25 және 26 жастағы азаматтар Арал теңізі аумағындағы №16 учаскеде өз жұмыстарын атқаруға шыққан. Қатты жел тұрып, күннің күрт құбылуы салдарынан олар жағаға оралған жоқ.

«Жоғалған 2 балықшыны іздеу шаралары қолға алынған. Бүгін барлығы 30-ға тарта қайықпен теңіз аумағында іздестіру шаралары жалғасады. Биыл мұндай оқиға алғаш рет тіркеліп отыр. Былтыр осындай 5 жағдай орын алған еді», - деп мәлім етті облыстық жұмылдыру дайындығы басқармасы басшысының орынбасары Ғабит Жаңабаев.

Бұдан бұрын Қызылордада мал іздеуге шыққан тұрғын адасып кеткен еді