Армения Бас штабы бастығының бұрынғы орынбасары қамауға алынды
АСТАНА. KAZINFORM - Тиран Хачатрян 2020 жылы қызметтік міндеттерін орындау кезінде салғырттық танытты деген күдікпен қамауға алынды.
Арменпресстің хабарлауынша, Армения Тергеу комитетінің Бас әскери тергеу басқармасының аса маңызды істерді тергеу бөлімі қылмыстық іс жүргізу шеңберінде Тиран Хачатрянның 2020 жылғы 7-17 қазан аралығында әскери жағдай кезінде өзінің қызметтік міндеттерін орындауға немқұрайлы қарағаны туралы нақты мәліметтер алды.
- Армения Республикасы Үкіметінің 2020 жылғы 27 қыркүйектегі қаулысымен АР Қарулы Күштері Бас штабы бастығының жауынгерлік бұйрығына сәйкес, қазан айынан бастап Оңтүстік күштер тобының қолбасшысы Тиран Хачатрян тағайындалды. Ол 2020 жылдың 7-17 қазан аралығында өзінің қызметтік міндеттерін орындауға немқұрайлылық танытқан, атап айтқанда Оңтүстік топтың басқару орталығын құрмаған және ұрыс қимылдарын жүргізу кезінде бақылауға қажетті бірқатар шараларды толық орындамаған, - деп хабарлайды Armenpress Арменияның Тергеу комитетіне сілтеме жасап.
Тергеу комитетінің мәліметінше, бұл әрекеттер қорғаныс сәтсіздігіне әкеліп соқты. Әскерлерді басқару жүйесіне нұқсан келтіріп, жүктелген жауынгерлік тапсырманы орындауға кедергі келтірді. Нәтижесінде қорғау тобына сеніп тапсырылған аумақты бақылауға алды.
2020 жылдың 27 қыркүйегінде Таулы Қарабақтағы әскери жағдайдың шиеленісуіне байланысты Арменияда әскери жағдай жарияланды. 2020 жылдың қазан айында Армения премьер-министрі Никол Пашинян Facebook парақшасында Тиран Хачатрянға Арменияның Ұлттық Батыры атағы берілетінін хабарлады.
2021 жылдың ақпанында Тиран Хачатрян Армения қарулы күштері Бас штабы бастығының бірінші орынбасары қызметінен босатылды. Арменияда әскери жағдай режимі 2021 жылдың наурыз айында кезектен тыс парламент сайлауы қарсаңында алынып тасталды.
Әзербайжан мен Армения шекараны белгілеу тәртібін талқылағанын жазған болатынбыз.
