Армения парламенті Еуропалық Одаққа кіру процесінің басталуы туралы заң жобасын мақұлдады
АСТАНА. KAZINFORM - Армения Ұлттық ассамблеясы «Армения Республикасының Еуропалық Одаққа қосылу процесінің басталуы туралы» заң жобасын бірінші оқылымда мақұлдады, деп хабарлайды Kazinform тілшісі.
12 ақпан күнгі кезекті сессияда Армения Ұлттық Жиналысының депутаттары көпшілік дауыспен «Армения Республикасының Еуропалық Одаққа қосылу процесінің басталуы туралы» заң жобасын бірінші оқылымда қабылдады. Заң жобасына 63 депутат дауыс берсе, 7 депутат қарсы болды.
- Армения Республикасы Армения халқының еркін білдіре отырып, Армения Республикасын қауіпсіз, қорғалатын, дамыған және гүлденген елге айналдыру міндетін алға қоя отырып, Армения Республикасының Еуропалық Одаққа қосылу процесінің басталғанын хабарлайды, - делінген заң мәтінінде.
Бірер күн бұрын Армения парламенті азаматтық бастамамен ұсынылған заң жобасын талқылауды бастаған болатын.
Бұған дейін Армения үкіметі ЕО-ға кіру процесін бастау туралы заң жобасын мақұлдады. Армения премьер-министрі Никол Пашинян елдің ЕО-ға кіруі туралы түпкілікті шешім референдум арқылы қабылдануы тиіс екенін атап өтті.
Арменияның Экономика министрі Геворг Папоян Армения үкіметінің заң жобасын мақұлдауы аясында Арменияның ЕАЭО мүшелігіне қатысты мәселеге түсінік берді.
2024 жылдың 1 шілдесінде Арменияның үшінші демократиялық форумында Армения премьер-министрі Никол Пашинян ЕО-ға кіру бойынша елде референдум өткізудің қажеті жоқ екенін мәлімдеді.
Осыған дейін Армения мен АҚШ-тың стратегиялық серіктестік туралы құжатқа қол қойғаны туралы хабарлаған едік.
