Арыстанбек Мұхамедиұлы Олимпиада чемпионы атағынан айырылған зілтеміршілермен кездеседі

АСТАНА. ҚазАқпарат - Бүгін ҚР Мәдениет және спорт министрі Арыстанбек Мұхамедиұлы допинг сынамада тыйым салынған заттар табылғаны үшін Лондон Олимпиадасының чемпионы атағынан айырылатын зілтеміршілермен кездеседі. Бұл туралы бүгін министр Үкімет отырысынан кейін БАҚ өкілдерінің сауалына орай айтты, деп хабарлайды ҚазАқпарат.

«Біз бұл мәселені Ұлттық олимпиада комитетімен бірлесіп зерделеп жатырмыз. Бұл халықаралық құқықтық мәселе болғандықтан, халықаралық заңнаманы барынша тыңғылықты қарастырудамыз. Өйткені, мұндай жайт Қазақстанда бірінші рет болып отыр әрі мәселе өте күрделі. Таяу уақытта біз халықаралық көзқарас тұрғысынан нәтижемізді жария ететін боламыз», - деді ол.

Сонымен қатар министр Илья Ильинге қатысты Халықаралық олимпиада комитетінен, Халықаралық ауыр атлетика федерациясынан спортшының нәтижелері жоққа шығарылатындығы туралы арнайы хат әлі келмегендігін атап өтті.

«Тағы да қайталап айтамыз, біз халықаралық тәжірибені барынша тыңғылықты зерделеп жатырмыз. Тіпті, алдын ала сіздерге бүгін спортшыларымызбен, Светлана Подобедовамен, Илья Ильинмен кездесетіндігімізді айта аламын. Мұны спортшыларымыздың назардан тыс қалмауы үшін жасаймыз»,- деді министр.

Сонымен қатар Мұхамедиұлы БАҚ өкілдеріне бұл мәселеде сабырлық сақтауға қажеттігін ескертіп, 1 апта ішінде спортшыларымызға қатысты нақты шешім қабылданатындығын айтты.

Айта кетейік, Халықаралық Олимпиада комитеті допинг сынамада тыйым салынған заттар табылған 2012 жылғы Олимпиада чемпиондары Светлана Подобедова, Майя Манеза, Зульфия Чиншанлоның көрсеткен нәтижелерін жоққа шығарылғанын ресми хабарлаған болатын.