Арыстанбек Мұхамедиұлының орынбасарын сот залынан жедел жәрдем алып кетті

АСТАНА. ҚазАқпарат – Ұлттық музейдің бұрынғы директоры Арыстанбек Мұхамедиұлы мен оның сыбайластарының үстінен қозғалған қылмыстық істің сот отырысы келесі аптаға ауыстырылды, деп хабарлайды ҚазАқпарат тілшісі.

Еске салайық, 17 сәуірде Ұлттық музейдің бұрынғы директоры Арыстанбек Мұхамедиұлы мен оның сыбайластарының (Алмаз Нұразхан, Азамат Көшенов, Айым Сәдуақасова) ісі бойынша сот отырысы басталды.

Қылмыстық іс елорданың №2 Байқоңыр аудандық сотында қаралып жатыр.

Бүгінгі сот отырысы барысында айыпталушылардың бірі Алмаз Нұразхан өзін жайсыз сезініп, көмек керегін мәлім етті.

Осылайша сотталушыны отырыс залынан жедел жәрдем алып кетті.

Судья өз кезегінде сот отырысын 24 сәуір сағат 10:00-ге ауыстырды.

«А. Нұразханды жедел жәрдем бригадасы клиникаға алып кетті, қайсы клиника екенін білмедім. Диагноз қою үшін белгілі бір сала мамандарының көмегі қажет», - деді айыпталушының адвокаты Мұстахим Төлеев.

Бұған дейін Арыстанбек Мұхамедиұлы мен сыбайластарына қандай айып тағылғаны белгілі болды.

Өз кезегінде айыпталушы Арыстанбек Мұхамедиұлы кінәсін мойындамады.

Сондай-ақ, сот Арыстанбек Мұхамедиұлын үйқамаққа ауыстырудан бас тартқан еді.

Еске салайық, былтыр 28 мамырда сот санкциясымен сол кездегі Ұлттық музей директоры Арыстанбек Мұхамедиұлы қамауға алынған болатын.