Әсел Қанай: Финалдық жекпе-жек қиын әрі эмоцияға толы болды
ТОИОХАШИ. KAZINFORM – Қазақстандық каратэші Әсел Қанай Жапониядағы жазғы Азия ойындарында жеңіс тұғырынан көрініп, күміс медаль еншіледі. Жарыстан кейін спортшы Kazinform тілшісіне финалдық айқасы және алдағы жосапрлары туралы айтып берді.
Спортшы ақтық бәсеке оңайға соқпағанын жасырмады.
- Бүгін сәттілік жетіспеді, бабым мен бағым келіспеген шығар. Өкінішке орай қытайлық қыз жеңіске жетті. Жалпы, финалдық жекпе-жек эмоцияналды түрде қиындыққа толы болды. Жарыстан тамаша әсер алдым, жылап та алдық. күліп те алдық,- деді Әсел Қанай.
Қазақстандық каратэші бүгінгі кездесудің қалай өткенін айтып берді.
- Қытай қызымен бірнеше рет айқастым. Біз бір-бірімізді өте жақсы білеміз, ол да маған қарсы жақсы дайындалғанын байқадым. Соңғы рет Азия чемпионатында оны жеңген едім. Бүгін де оны жеңетініме сенімді болдым. Алайда, төрешілер шешімімен күміс жүлде бұйырды,- деді ол.
Әсел Қанай алдағы додаларда ел намысын абыроймен қорғауды жоспарлап отырғанын тілге тиек етті.
- Алда Астанада Қазақстан чемпионаты бар, одан кейін келесі жылы әлем чемпионаты келе жатыр. Еліме алтын медаль сыйлаймын деп үміттенемін,- деді спортшы.
Осыған дейін хабарлағанымыздай, Әсел Қанай әйелдер арасында 61 кг салмақта кумите бағдарламасында қытайлық Гун Лиға 8:2 есебімен жеңіліп, күміс жүлде еншіледі.
Отандасымыз ширек финалда моңғолиялық Пуревжав Маралжингооны 9:1 есебімен жеңсе, жартылай финалда камбоджалық Ван Чакрияны 3:0 есебімен қапы қалдырды.
