Асхат Аймағамбетов: Мектептегі критериалды бағалау жүйесіне өзгеріс енгізуге дайынбыз
НҰР-СҰЛТАН. ҚазАқпарат - Еліміздің орта мектептеріндегі критериалды бағалау жүйесі сол күйінше қалады. Бұл туралы ҚР Білім және ғылым министрлігінің кеңейтілген алқа отырысында ведомство басшысы Асхат Аймағамбетов айтты, деп хабарлайды ҚазАқпарат тілшісі.
«Соңғы уақытта мектептегі бағалау жүйесі туралы көптеген жағымсыз ақпараттар тарап жатыр. Біз кеше бұл мәселені талқыладық. Жалпы, министрліктің ұстанымы келесідей: критериалды бағалау жүйесі қалады. Одан ауытқып кетуге болмайды. Жалпы оны мұғалімдер қабылдады. Бірақ оны жетілдіру үшін тиісті, керек өзгерістерді енгізуге дайынбыз», - деді министр.
