Әскер қатарын 20 мыңнан астам азамат толықтырады

АСТАНА. KAZINFORM — Әскер қатарын 20 мыңнан астам азамат толықтырады. Бұл туралы Орталық коммуникациялар қызметіндегі брифингте Қарулы күштері Бас штабы бастығының орынбасары генерал-майор Сәкен Жүсіпов айтты.

— Президенттің 2025 жылдың 13 ақпандағы № 782 Жарлығына сәйкес наурыз айынан бастап жергілікті атқарушы орган әкімдері орынбасарларының басшылық етуімен 195 қалалық және аудандық әскерге шақыру комиссиясы азаматтарды көктемгі мерзімді әскери қызметке шақыруға кірісті. Маусым айының отызына дейін Қарулы күштердің, басқа да әскерлер мен әскери құралымдардың қатарын әскерге шақыруды кейінге қалдыруға немесе одан босатуға негізі жоқ, 18-ден 27 жасқа дейінгі 20 мыңнан астам ер азамат толықтыратын болады, — деді генерал-майор.

Оның атап өтуінше, Қорғаныс министрлігі әскерде құқықтық тәртіптің сақталуына, әскери қызметшілердің өмірі мен денсаулығын сақтауға бағытталған шаралар жүйесін жасады. Әрбір сарбаздың өмірі бақылауда болады. Оған «Сарбаздар аналары комитеті» тартылды.

— Әскерде сарбаздардың ата-аналарымен және туыстарымен бейнебайланысқа шығуын қамтамасыз ететін «Отбасымен бейнеқоңырау» сервисі белсенді қолданылып жатыр. «ARMIA.KZ.» ақпараттық сервисі жұмыс істеп тұр. Ол Қарулы күштерді цифрландыру және азаматтармен «Ашық үкімет» қағидаты бойынша өзара әрекет етуді жақсарту үшін жасалды, — деді Сәкен Жүсіпов.

Қорғаныс министрлігі ұсынған мәліметке сәйкес, әскер қатарына 20 833 адам тартылады. Оның ішінде:

Қарулы күштерге — 10 598 адам;
Ұлттық гвардияға — 7 054 адам;
ҰҚК Шекара қызметіне — 2 500 адам;
Төтенше жағдайлар министрлігіне — 391 адам;
Мемлекеттік күзет қызметіне — 290 адам.

Бұған дейін Мемлекет басшысы Қасым-Жомарт Тоқаев Қазақстан Республикасының азаматтарын 2025 жылдың наурыз-маусымында және қыркүйек-желтоқсанында мерзімді әскери қызметке кезекті шақыру туралы туралы Жарлыққа қол қойғанын жазған едік.