Әскерге шақырылған сарбаз борышын өтейтін әскери бөлімді өзі таңдай ала ма

АСТАНА. KAZINFORM – ҚР Қарулы күштері Бас штабы Ұйымдастыру және жұмылдыру жұмыстары департаменті Әскерге шақыру және әскерден тыс жұмыстар басқармасының аға офицері Дәуренбек Шегебаев әлеуметтік желіде тікелей эфирге шығып, азаматтарды мерзімді әскери қызметке шақыру тәртібін түсіндірді.

- Әскерге шақырту алған сарбаз борышын өтейтін әскери бөлімді өзі таңдай ала ма? Мысалы, ол өзі туған өлкедегі бөлімді борышын өтегісі келсе, рұқсат етіле ме, - деген сұрақ қойылды эфир барысында.

Қарулы күштердің Бас штаб өкілі заңда ондай жеңілдік қарастырылмағанын айтты.

- Әлбетте, заңнамада ондай мүмкіндік қарастырылмаған. Бірінші әскери комиссия әр сарбазды іріктеп, зерделейді. Сол кезде оның алған білім санатына, денсаулық жағдайына, жеке басының қасиеттеріне қарап комиссия мамандары жан-жаққа бөледі. Яғни, әскери бөлімді сарбаздың өзі таңдау деген мәселе қарастырылмаған. Бірақ менің білуімше, кейде командалардың әскери бөлімдері жекелеген шешімдер қабылдап жатады. Ондай сирек болады, - деді ол.

Дегенмен Қорғаныс министрлігі бұл бағытта бірқатар өзгерістерді сынақтан өткізіп жатқан көрінеді.

- Жоғарғы басшылықтың қойған талабы бойынша соңғы шақырылымдарда әскери борышты аймақтық принцип бойынша атқару дұрыс деп есептеледі. Ондай бетбұрыс бар. Қазір жергілікті әскери басқару органдары осы принципке біртіндеп көшіп келеді, - деді Қарулы күштердің аға офицері.

Еске салсақ, Мемлекет басшысы Қасым-Жомарт Тоқаев жуықта ғана әскери қызметке шақыру туралы Жарлыққа қол қойған еді.